13 may 2019-cu il tarixdə Azərbaycan Respublikası Xarici İşlər Nazirliyinin Naxçıvan Muxtar Respublikasındakı İdarəsinin rəisi Vüsal Ələkbərli İran İslam Respublikasının Naxçıvandakı fəaliyyət müddəti başa çatmış baş konsulu Mənsur Ayrom ilə görüşmüşdür.
Mənsur Ayrom Baş Konsulluğun fəaliyyəti üçün yaradılan şəraitə görə Naxçıvan MR Hökumətinə və İdarə rəisinə öz minnətdarlığını bildirmiş, bu müddət ərzində muxtar respublika əhalisinin xoş münasibətini həmişə yaxından hiss etdiyini vurğulamışdır.
İdarə rəisi baş konsulun İran İslam Respublikası ilə Naxçıvan Muxtar Respublikası arasında ikitərəfli münasibətlərin inkişafına verdiyi töhfəni yüksək qiymətləndirmiş, Mənsur Ayromun muxtar respublikadakı diplomatik fəaliyyət müddətinin əlaqələrin möhkəmləndirilməsi baxımından mühüm dövrü əhatə etdiyini qeyd etmiş, baş konsula gələcək diplomatik fəaliyyətində uğurlar arzulamışdır.