30 aprel-01 may 2018-ci il tarixlərdə Avropa İttifaqının (Aİ) Azərbaycan Respublikasındakı Nümayəndəliyinin rəhbəri Kestutis Yankauskas və həyat yoldaşı Ramune Jankauskiene Naxçıvan Muxtar Respublikasına rəsmi səfər etmişdir. Səfər cari ilin sentyabr ayında Naxçıvanda keçiriləcək “Avropa günləri” layihəsinə hazırlıq və “Peşə təhsili və təlimi, bacarıqların gələcək inkişafı və iqtisadiyyatın rəqabət qabiliyyətinin gücləndirilməsinə dair təcrübə mübadiləsi” seminarında iştirak məqsədi daşımışdır.

Səfər çərçivəsində səfir bir sıra rəsmi görüşlər keçirmişdir.

01 may 2018-ci il tarixdə K.Yankauskas Avropa İttifaqının Azərbaycandakı Nümayəndəliyinin, Naxçıvan Muxtar Respublikası Təhsil Nazirliyinin və Azərbaycan Respublikasının Peşə Təhsili üzrə Dövlət Agentliyinin birgə təşkilatçılığı ilə “Azərbaycanda peşə təhsili və təliminə Avropa İttifaqının dəstəyi” layihəsi çərçivəsində “Peşə təhsili və təlimi, bacarıqların gələcək inkişafı və iqtisadiyyatın rəqabət qabiliyyətinin gücləndirilməsinə dair təcrübə mübadiləsi” adlı seminarda və ümummilli lider Heydər Əliyevin anadan olmasının 95-ci ildönümünə həsr olunan “Naxçıvan– 2018” Beynəlxalq Şahmat Festivalının açılış mərasimində iştirak etmişdir.

İki günlük səfər çərçivəsində qonaqlar “Əshabi-Kəhf Ziyarətgahı” Dini-Mədəni Abidə Kompleksini ziyarət etmiş, Əlincəqala tarixi abidəsi ilə tanış olmuşlar.